July 13, 2018

ෆේස්බුක් මැසෙන්ජර් හරහා ආ මැල්වෙයා වයිරසය

                           දැන් ටික දිනක පටන් ෆේස්බුක් මැසෙන්ජර් හරහා “This video is yours?” යනුවෙන් ලිංක් එකක් හුවමාරු වුණා. මුලින්ම මේ ගැන වාර්ථා වුණේ සිංගප්පූරුවෙන්. තමංගේම යහළුවෙකු මාර්ගයෙන් ෆේස්බුක් මැසෙන්ජර් හරහා මේ පණිවිඩය පැමිණිම නිසා ගොඩක් අය මේ වයිරසයට ගොදුරු වුණා.
                      මේ විදිහට ආපු පණිවිඩයේන් ඇත්තටම සිදුවුණේ වීඩියෝවක් පෙන්වීම නම් නෙවෙයි. ඒ වෙනුවට සිදුවුණේ ෆේස්බුක් ලොගින් විස්තර ලබාගැනීමට හැකි මැල්වෙයා වැඩසටහනක් හොර රහසේම පරිගණකයේ ඉන්ස්ටෝල් කිරීමයි. ඇතැම් වෙලාවට වීඩියෝ එක පෙන්වනවා වෙනුවට ෆේස්බුක් ලොගින් පේජයට සමාන වෙබ් පිටුවක් විවෘත වුණා. ඒ ඇත්ත වෙබ් පිටුව වෙනුවට සැකසූ ව්‍යාජ (ෆිෂින්) වෙබ් පිටුවක්. එහෙදී වීඩියෝව බැලීමට නම් ෆේස්බුක් ලොගින් විස්තර ඇතුලත් කරන ලෙස පැවසුවා.එයට ඇතුලත් කරන තොරතුරු සියල්ල මේ පණිවිඩය එවූ හැකර් කරු සතුවනවා. 
සැබෑ වෙබ් පිටුව ලෙසම සැකසූ ව්‍යාජ වෙබ් පිටුවක් (Address bar එක බලන්න )

                            දැනටමත් මැසෙන්ජර් හරහා එවන පණිවිඩ එවනු ලබන්නේ මෙලෙස හැකර් කරුවන් අතට පත්වූ ෆේස්බුක් ගිණුම් වලිනි. ඒ වගේම තවත් ආකාරයක වංචනික වෙබ් පිටුවකදී  ලිංක් එක ක්ලික් කල කෙනාට වීඩියෝව බලන්න අවශ්‍ය නම් ඒ වෙබ් පිටුවේ තියෙන කේතයක් බ්‍රව්සරයේ ඇඩ්‍රස් බාර් එකට කොපි කරන ලෙස පැවසුවා. එසේ කල විට සිදුවන්නේ අයිතිකරුගේ ෆේස්බුක් ගිණුම සියතට ගතහැකි JavaScript එකක් හැකර් කරු විසින් ක්‍රියාත්මක කිරීමයි.

▶️ෆේස්බුක් ගිණුම් මොකටද?
            මේ විදිහට ලබාගන්නා ගිණුම් වලින් හැකර් කරුවන් තවදුරටත් වෛරසය පැතිරවීම වගේම ගිණුම් හිමියා සිදු කරන ක්ලික් කිරීම් , සෙවීම් ආදිය ඉලක්ක කර කරදරකාරී දැන්වීම් එවීම සිදුකරනු ලබනවා. ඒවායින් ඔවුන් මුදල් උපයනු ලබනවා.

▶️ආරක්ෂා වෙන්නේ කොහොමද?
                      ෆේස්බුක් ගිණුමට අනවසර ඇතුල් වීම් වලක්වන ක්‍රමයක් ෆේස්බුක් ගිණුමේම තියෙනවා. ඒ තමයි two-factor authentication නැතිනම් ආකාර දෙකකින් අනන්‍යතාව තහවුරු කිරීමේ ක්‍රමය යොදා ගැනීම. ෆේස්බුක් පිටුවේ දකුණුපස ඉහල, පහලට  ඇති (▼) ආකාරයේ අයිකනය ක්ලික් කර Settings > Security and Login ක්ලික් කර එයින් two-factor authentication තෝරා ගෙන තමන්ට පහසු ක්‍රම දෙකක් තෝරා ගෙන ඉදිරියට යා යුතුයි. 
ඒ වගෙම මෙවැනි අනර්ථකාරී වෙබ් අඩවි වලින් වැලකෙන්න කරන්න පුළුවන් සරල උපක්‍රම කීපයක් තියෙනවා.
  1. තමන් නොදන්නා වෙබ් අඩවි වලදි කිසිම විටක කිසිම ගිණුමක තොරතුරු ඇතුලත් නොකිරීම.
  2. සෑම විටම හරිම වෙබ් අඩවියේ සිටින්නේ දැයි විමසිලිමත් වීම.
  3. ශක්තිමත් මුර පදයක් භාවිතා කිරීම.
  4. ගිණුමේ තොරතුරු කිසිඳු හේතුවක් මත අන්අය අතට පත් නොකිරීම.
  5. පොදු ස්ථානයකදී (Internet Cafe) හෝ වෙන කෙනකුගේ පරිගණකයකදී ගිණුම් විවෘත කිරීමට වෙබ් බ්‍රව්සරයේ Incognito Mode ආකාරය යොදා ගැනීම. 
  6. යාවත්කාලින කරන සුදුසු Anti Virus මෘදුකාංගයක් ක්‍රියාත්මකව තැබීම.

මේ විදිහට වැඩ කරනවා නම් බොහෝදුරට මෙවැනි කරදර වලින් බේරීලා ඉන්න පුළුවන්.

July 6, 2018

සම්පත් බැංකුවේ Slip-less ඇප් එකෙන් වැඩ ගන්නෙ මෙහෙමයි

                                එදිනෙදා සිදුවෙන ගණුදෙනු පහසු කරන්න බැංකු මගින් නොයෙක් තාක්ෂණික සේවා පහසුකම් ලබා දෙනවා. ඒ අතරින් මෑතකදී සම්පත් බැංකුව හදුන්වා දුන්න සේවයක් තමයි Sampath Slip-less ඇප් එක. පුරුදු විදිහට බැංකුවට ගිහින් Cash deposit slip එකක් පුරවනවා වෙනුවට මේ ඇප් එකට තොරතුරු ඇතුලත් කරලා බැංකුවට දෙන්න පුළුවන් කරන්න පුළුවන්.

ඇප් එක Download කරගන්න

                ඇන්ඩ්‍රොයිඩ් ෆෝන් වලට Google Play වලින් වගේම ඇපල් ෆෝන් වලට App Store වලින් Slip-less ඇප් එක ඩවුන්ලෝඩ් කරගන්න පුළුවන්.

වැඩ කරන්නෙ මෙහෙමයි
                ඇප් එක install කරගත්තට පස්සෙ මුලින්ම එන්නෙ මේ screen එක. ඒකෙදි නම, ජාතික හැදුනුම් පත් අංකය, ෆෝන් නම්බර් එක වගේම ලිපිනයත් දෙන්න ඕනි. ඊට අමතරව දැනටමත් සම්පත් බැංකුවේ ගිණුමක් තියෙනවද නැද්ද කියන එකත් ඇප් එකෙන් අහනවා. ගිණුමක් නැති කෙනෙක් නම් මුදල් තැන්පත් කරන්න විතරක් පහසුකම් ලැබෙනවා.
                      ඊට පස්සේ දීපු ෆෝන් නම්බර් එක තහවුරු කරගන්න අංක හතරක කෝඩ් එකක් එවනවා. අන්න ඒක ඊළඟට එන screen එකේ ටයිප් කරන්න ඕනි. 

අලුත් ස්ලිප් එකක් පුරවන හැටි 
           ඊළඟට එන Slip screen එකේ pending කියන ටැබ් එකෙ පහල තියෙන + ලකුණ ටච් කලාම අලුත් ස්ලිප් එකක් ලැබෙනවා.
              දැන් ඉතින් සාමාන්‍ය slip එකක වගේම උඩින් ගිණුම් අංකය නෝට්ටු ප්‍රමාණය වගේම මුදල රු.200,000 වැඩි නම් අවශ්‍යතාවය සඳහන් කරන්න ඕනි.
      මේ ඔක්කොම විස්තර ටික ඇතුලත් කරලා පහලින් තියෙන Create Transaction කියන බට්න් එක ටච් කරාම Cash Deposit Slip එක හැදෙනවා.
             දැන් කරන්න තියෙන්නෙ මේ හදපු ස්ලිප් එක සල්ලිත් එක්ක බැංකුවට ගිහින් දෙන එකයි. Pending list එකේ තියෙන slip එක open වුණාම මේ විදිහට Reference number එකක්, QR Code එකක්, Bar Code එකක් එක්ක ගණුදෙනුවෙ සාරාංශයක් බලා ගන්න පුළුවන්. බැංකුවට මේ Reference Number එක තමයි ඕනි වෙන්නෙ.    
            
 ඒවගේම ඒ ගණුදෙනුව ගැන විස්තරයක් ඊ-මේල් එකටත් එනවා. ඕනි නම් රිසිට් එකක් වෙනම ගන්නත් පුළුවන්.
බැංකුවෙන් ලැබුණ රිසිට් එක 

ඊ-මේල් එකට ආපු විස්තරය 
   ගණුදෙනුව සම්පූර්ණ වුණාම ඒක Completed ටැබ් එකේ පෙන්නනවා. 
           ස්මාර්ට් ෆෝන් වලට අලුත් අයට නම් මේක ටිකක් කරදරකාරී වැඩක් වෙන්න පුලුවන්. කොහොම වුණත් නිතර ගණුදෙනු කරන අයට නම් මේ ඇප් එක වටිනවා. ඒ වගේම මේ ඇප් එකේ වැඩ කරන්න නම් internet තියෙන්න ඕනි.  එහෙම නැති වෙලාවක නම් payment එකට අදාල reference number එක මතක නැත්නම් බැංකුවට ගිහින් පුරුදු කඩදාසි කොලය පුරවන්න වෙනවා!

June 14, 2018

ෆෝන් එකට එන්ඩස්කොප් කැමරාවක්

                  එන්ඩස්කොප් කැමරාවක් (Endoscope Camera) කියන්නෙ අපිට බලාගන්න අමාරු තැනක  (සිදුරක්, උපකරණයක ඇතුලතක්, ශරීර අභ්‍යන්තරය) තියෙන දෙයක් බලාගන්න යොදාගන්න කැමරාවක්. සාමාන්‍යය භාවිතයෙන් ටිකක් ඈත් වුණත් මේ කැමරාවකින් ගන්න පුළුවන් ප්‍රයෝජන ගොඩක් තියෙනවා. මේ ලිපිය ඒ වගේ සාමාන්‍ය භාවිතයට හදපු එන්ඩස්කොප් කැමරාවක් ගැනයි.

           මේ කැමරාව  eBay, Ali express වගේ ශොපින් වෙබ් සයිට් වලින් මිලට ගන්න පුලුවන්. කැමරාව මීටර් 1, 2.5 , 3 , 5 යන ප්‍රමාණ වලින් ගන්න පුළුවන්. මේ කැමරාව ගන්නෙ පැහැදිලිව බලාගන්න බැරි තැන් බලන්න නිසා අමතර ආලෝකයක් වුවමණා වෙනවා. ඒ හින්දම මේ කැමරාවටම සම්බන්ද කෙරුණු LED එළිය අඩු වැඩි කරන්න පුළුවන් බල්බ් 6ක් තියෙනවා.
        ඇන්ඩ්‍රොයිඩ් 6.0 පටන් උඩට තියෙන, OTG සහය දක්වන ස්මාර්ට්  ෆෝන් වලට micro USB කනෙක්ටර් එකෙන් කෙලින්ම සම්බන්ධ කරන්න පුළුවන්. ඒත් ඇපල් වලට නම් මේක වැඩකරන්නෙ නෑ. ලැප්ටොප් එකට හරි ඩෙස්ක්ටොප් එකට හරි සෙට් කරගන්න ඕනි නම් ඒකට micro USB to Stranded USB කනෙක්ටර් එකක් තියෙනවා. 
               IP67  Waterproof ratings තියෙන නිසා වතුරටත්  ඔරොත්තු දෙනවා. කැමරාවෙ මූහුණතේ වටප්‍රමාණය මිලිමීටර් 7 යි. අලුත් වැඩියා කටයුතු කරන අයට නම් මේක ගොඩක් ප්‍රයෝජනවත්.
                  කැමරාවත් එක්ක කම්බි වලින් හදපු කොකු දෙකක්, කාන්දම් වලින් රඳවන්න පුළුවන් කොටසක් ලැබෙනවා. ඒකෙන් අවශ්‍ය තැන් වල රඳවා ගන්න පහසු වෙනවා. 
        ඇන්ඩ්‍රොයිඩ් ෆෝන් එකක් එක්ක වැඩ කරනවා නම් Camera Fi  වගේ ඇප් එකක් ඩවුන්ලොඩ් කරගන්න ඕනි. ලැප්ටොප් එකක නම් වින්ඩෝස්  වලට එන කැමරා ඇප් එකෙන්ම වැඩ කරන්න පුලුවන්.
            ඉක්මනින් වුවමනා කෙනෙක් ඉන්නවනම් දැනට ගෙන්වලා පරික්ෂා කරලා බලපු කැමරා කීපයක් තියෙනවා. එහෙම ගෙන්න ගන්න ඕනි අය  071-6334427 කියන අංකයට කතා කරලා විස්තර දැනගන්න 

June 5, 2018

පලමු වරට ඇසේ සිවියක් 3D මුද්‍රණයෙන්

          3D ප්‍රින්ටරයකින් ශරීර අවයව මුද්‍රණය කිරීමේ තාක්ෂණයක් ගැන මීට කලින් tech සයුරෙ ලිපියක් පලවුණා.හදිසි අනතුරු හා විවිධ ආබාධ නිසා ශරීරයේ කොටස් අහිමි වූ හෝ ඉවත් කිරීමට සිදුවූ පුද්ගලයින් ගේ ශරීරාංඟ 3D තාක්ෂණය ඔස්සේ මුද්‍රණය කිරීම මෙම තාක්ෂණය ඔස්සේ  සිදුවුණා. ඉතිං විවිධ සමාගම් මිනිස් පටක මුද්‍රණය ගැන කරපු පරීක්ෂණ වල ප්‍රතිඵලක් විදිහට ඔන්න දැං මිනිස් ඇසත් 3D තාක්ෂණයෙන් මුද්‍රණය කරන්න පුළුවන් වෙලා තියෙනවා.
(L-R) Dr Steve Swioklo and Professor Che . Credit: Newcastle University, UK
             දැනට ලෝකේ මිලියන 15 ක් විතර අක්ෂි රෝග වලින් ප්‍රීඩා විඳිනවා. ඒසේ  රෝග වලින්, අනතුරු වලින් ඇසට හානි සිදුවූවන්ට  සුව කර ගන්න නම් ඇසේ ස්වච්ඡය නැත්නම් සිවිය බද්ධ කරන්න වෙනවා. එහෙම බද්ධ කරන්නත් ඒ ඇසට ගැලපෙන වෙනත් ස්වච්ඡයක් තියෙන්න ඕනි. මේ ගැන පරීක්ෂණ කරපු එක්සත් රාජධානියේ නිව්කැස්ට්ල් විශ්වවිද්‍යාලයේ (Newcastle University United Kingdom) පරීක්ෂකයන්ට විසඳුමක් ලැබිලා තියෙනවා. මේ පරීක්ෂණ සාර්ථක වුණොත් ඊළඟ අවුරුදු කීපය තුලදී කෘතිමව නිපදවපු මිලෙන් අඩු සිවියක් ලබා ගන්න පුළුවන් වෙනවා.
(L-R) Dr Steve Swioklo and Professor Che Connon with 3D printer. Credit: Newcastle University, UK
         ඇසේ සිවියක් මුද්‍රණයට අවශ්‍ය තීන්ත හදන්න ගන්නෙ නීරෝගී පුද්ගලයෙකුගෙන් ලබාගන්න සෛල , කොලජන් හා ඇල්ගී ජීවී අනු සමග මිශ්‍ර කර ලබා ගන්නා ද්‍රාවනයකිනි. ඒ තීන්ත යොදාගෙන විශේෂිත වූ 3D මුද්‍රණ යන්ත්‍රයක් ආධාරයෙන් මුද්‍රණය කරනු ලබයි.
       මේ සඳහා මූලික අවශ්‍යතා 3ක් සපුරා ගන්න ඕනි. එකක් නීරෝගී ඇසකින් ලබාගන්න සෛල සුදුසු මාධ්‍යක් තුල වගා කරන්න පුළුවන් වීම. අනෙක මේ සාදගන්න තින්ත මුද්‍රණය කරන විට ඉතා කුඩා සිදුරකින් හානියකින් තොරව ලබාගන්න පුළුවන් වීම. ඊළඟ එක මුද්‍රණය කරන සිවිය රඳවා ගන්න සුදුසු මාධ්‍යක් තෝරා ගන්න එක. දැනටමත් කාමර උෂ්ණත්වයේ සෛල තබාගන්න පරීක්ෂකයන්ට පුළුවන් වෙලා තියෙනවා. රෝගින්ගේ  ඇසේ සිවිය එකිනෙකාට වෙනස් නිසා එහි මිනුම් ලබාගන්නේ ඇසේ ලබාගන්නා පින්තූර ආශ්‍රයෙන් නිර්මාණය කරගන්නා 3D මොඩලයක් ඇසුරිණි.
         ලොව පුරා ඇසට සිදුවන හානි නිසා රෝගී වන පිරිසට සාපේක්ෂව ඇස් දන් දෙන පිරිස සීමිතය.මේ පරීක්ෂණ සාර්ථක වුවහොත් මිලියන ගණනකට නැවත පෙනීම ලබා දීමට පුළුවන් වනු  ඇත.


May 30, 2018

ලැම්බෝගිනි ඉලෙක්ට්‍රික් කාර් එක

                    ලැම්බෝගිනි කියන්නෙ ලෝකේ අංක එකේ sport මෝටර් රථ නිපදවන සමාගමක්. ලැම්බොගිනි සමාගමයි මැසචුසෙට්ස් තාක්ෂණ විද්‍යායතනය (MIT) එකතුවෙලා ඉදිරි ලෝකෙට ගැලපෙන ඉලෙක්ට්‍රික් sport කාර් එකක් හදන්න දැන් සැලසුම් කරනවා.
                             මේ අලුත් කාර් එක නම් කරලා කරලා තියෙන්නෙ Terzo Millennio කියලයි. ඉලෙක්ට්‍රික් කාර් කියන එක දැන් ලෝකේ trend එකක් වෙලා තියෙන නිසා අලුතෙන් කාර් එකක් හදනවනම් ඒක අනෙක් ඒවට වඩා විශේෂ වෙන්න ඕනි. ඒ හින්දා වෙනස්ම තාක්ෂණයක් යොදාගෙන නිපදවන්න තමයි දැන් සැලසුම් කරලා තියෙන්නෙ. දැක්ක ගමන් පේන්නෙ විද්‍යා ප්‍රබන්ධ චිත්‍රපටියක තියෙන කාර් එකක වගේ පෙනුමක්. ලැම්බෝගිනි පරීක්ෂණ හා ප්‍රවර්ධන (R&D) අංශයේ ප්‍රධානියා වෙන Maurizio Reggiani මේ රථය ගැන අදහස් දක්වලා තිබුණා.
                   Tesla, Nisan, Jaguar වගේ ඉලෙක්ට්‍රික් කාර් එකක තියෙන බැටරි පද්ධතිය වගේ එකක් Aventador වගේ රථයකට ගැලපෙන්නෙ නෑ. ඒකට ප්‍රධාන හේතුව බැටරි පද්ධතියේ බර හා විශාලත්වයයි. Maurizio කියන විදිහට මේ රථයට 186 mph වේගයෙන් Nordschleife ධාවන පථයේ වට 3 ක් පූර්ණ ලෙස ගමන් කල හැකි  විය යුතුයි. දැනට පවතින බැටරි තාක්ෂණයෙන් මෙය කල නොහැකිය. දැනටමත් සමහර ඉලෙක්ට්‍රික් වාහන වල යොදා ගන්නා ස්කේට් බෝඩ් වල චැසියක් මෙන් කුඩා මෙට්ට ආකාරයට චැසිය අභ්‍යන්තරයේ තැන්පත් කරන ලද බැටරි SUV වැනි රථ සඳහා සුදුසු වුණත් ලැම්බෝගිනි වැනි ස්පෝර්ට් කාර් එකක් සඳහා සුදුසු වෙන්නෙ නෑ. ඒ නිසා ලැම්බෝගිනි හා MIT එක අලුත් තාක්ෂණයක් හඳුන්වා දීලා තියෙනවා. ඒ තමයි තනි බැටරියක් වෙනුවට නැවත ආරෝපණය කරන්න පුලුවන් බඳ කොටස් (Body panels) යොදා ගැනීම. තරමක් අමුතු දෙයක් විදිහට පෙනුනත් මේ නිසා රථයේ වේගය, පාලනයේ පහසුව වගේම බැටරියේ ධාරිතාවත් වැඩි වෙනවා. බැටරි ආරෝපණ කොටස් සාමාන්‍යයෙන් තිබිය හැකි ස්ථාන වලින් වෙනස් ව වාහනයේ suspension කොටස් වල, ආසන වල පිටුපස පවා මේ කොටස් අඩංගු වෙන විදිහට නිපදවන්නයි නිර්මාණ කරුවන්ගේ අරමුණ. ලැම්බෝගිනි හා MIT බුද්ධිමතුන් දැන් වෙහෙසෙන්නේ මේ මේ සැලැස්ම යතාර්ථයක් කිරීමටයි. මෙය හුදෙක් sport car එකක් නොව super sport car ක් වනු ඇත.  
                                           
                        තව අවුරුදු 3 කින් MIT පරීක්ෂණ වලින් පසු එහි ප්‍රතිඵල අනුව මේ ව්‍යාපෘතිය කල හැකිද, නොහැකිද යන්න තීරණයකට එනු  ඇත. එහි ප්‍රතිඵල සුබවාදී නම් තවත් අවුරුදු 2 ක් කාර්මික කටයුතු සඳහා ගතවන අතර තවත් අවුරුදු 5 ක් නිෂ්පාදන කටයුතු කටයුතු සඳහා ද ගිය පසු න්‍යායිකව වසර 2030 වන විට සම්පූර්ණයෙන් නිමැවූ ඉලෙක්ට්‍රික් ලැම්බෝගිනියක් ලෝකයට ලැබෙනු ඇත. කෙසේවෙතත් මීලඟට පැමිණීමට නියමිත Aventador මාදිලිය සම්පූර්ණ ඉලෙක්ට්‍රික් නොවී plug-in-hybrid ලෙස පැමිණෙනු ඇත.

May 22, 2018

ඇපල් වෙතින් මිල අඩු Home Pod එකක්?

                        ඇපල් හෝම් පොඩ් ගැන හුගක් අය දන්නවත් ඇති. ගූගල් හෝම්, ඇමේසන් එකෝ වගේ ඇපල් සමාගමෙන් නිකුත් කරපු home assistant උපාංඟය තමයි ඇපල් හෝම් පොඩ් කියන්නෙ. හෝම් පොඩ් එක ඇපල් සිරි වලින් වැඩ කරන home assistant එකක් වගේම හොඳ  music player එකක්.
             ඇපල් හෝම් පොඩ් එකට ආරම්භයේ ඉදන්ම හොද උණුසුම් පිළිගැනීමක් ලැබුණේ නෑ. $345 වගේ (ලංකාවේ මුදලින් රු.54,500 කට) ඉතා අධික මිලක් වෙනවා වගේම අනෙක් උපාංගත් එක්ක සාපේක්ෂව තියෙන පහසුකම් වලත් සීමාවක් තිබීම නිසා හෝම් පොඩ් එකට පාරිභෝගියන් අතර ජනප්‍රිය වෙන්න බැරි වුණා. මේ තත්වය තේරුම් ගත්ත ඇපල් සමාගම ඔන්න හෝම් පොඩ් එකේ තව සංස්කරණයක් මේ අවුරුද්දෙ නිකුත් කරන්න නියමිතයි. ආරංචි වලට අනුව මේ අලුත් උපාංගය $199 (ලංකාවේ මුදලින් රු.31,400 කට) වගේ මිලකට අලෙවි කරන්න නියමිතයි.
               මේ විදිහට මිල අඩු වීමේදී ඒ හා සාපේක්ෂව දෘඩාංග වල වෙනස්කම් වෙලා තියෙනවා. ඒ අනුව ප්‍රධාන වෙනසක් විදිහට කලින් උපාංගයේ තිබුණු Apple A8 ප්‍රොසෙසරය වෙනුවට MediaTek ප්‍රොසෙසරයක් ඇතුලත් කරලා තිබෙන එක. ඇපල් සමාගම මෙසේ මිල අඩු දෙවන සංස්කරණයක් සාදන ප්‍රථම අවස්ථාව මෙය නොවේ. මීට කලින් 2017 දී iPad හි ලාබ සංස්කරණයක් ද ඇපල් සමාගමෙන් නිකුත් කරණු ලැබුවා.
               ඇපල් සමාගම මින් බලාපොරොත්තු වනු ඇත්තේ සියලුදෙනාට මිලදී ගත හැකි තනි උපකරණයක් සංස්කරණ දෙකක් යටතේ නිකුත් කිරීමයි. එමගින් ගිළිහී යන වෙළඳ පොළ ද යම් තාක් හෝ ගැට ගසා ගැනීමයි. ඒ කෙසේ වෙතත් මේ උපකරණයටත් Amazon Echo Dot , Google mini වැනි අනෙක් සමාගම් වල උපකරණයන්හි මිලෙන් අඩු සංස්කරණයන් සමගද තරඟ කිරීමට සිදුවනු ඇත.

April 17, 2018

හොරට හදපු PL2303 ට අහුවුණාද? මෙන්න විසඳුම

              හැමෝටම සුබ අලුත් අවුරුද්දක් වේවා! කියලම වැඩේ පටන් ගත්තා එහෙනම්. අලුතින් එන ගොඩක් පරිගණක වල පරණ කාලේ පරිගණක වල තිබුණු Serial, Parallel port නෑ. ඉතිං මේ නිසා ඒ port එකක් ඕනි වුණාම කරන්න තියෙන්නෙ ඒ port එක තියෙන කාර්ඩ් එකක් හයි කරන එක. ඊටත් ලේසියි USB converter එකක් ගන්න එක. 

                   ඉතිං මේ අතර තියෙන ජනප්‍රිය USB-to-UART (Serial නැත්නම් COM port) converter එකක් තමයි Prolific PL2303 කියන්නෙ. ebay, Aliexpress වගේ ඔන්ලයින් ෂොපින් සයිට් වලින් මේක ගන්න පුලුවන්. මෙහෙම විකුණන device වලින් ගොඩක් ලාබෙට තියෙන එකක් ගන්න තමයි ගොඩක් අය උත්සහ කරන්නෙ. හැබැයි මේ ලාබෙට තියෙන ගොඩක් ඒවා අදාල සමාගමෙන් හදන ඔරිජිනල් device නම් නෙවෙයි. ඒ විදිහටම හදපු ව්‍යාජ ඒවා. ප්‍රශ්ණෙ පටන් ගන්නෙ මේකෙ device drivers install කරන්න යනකොටයි. ඒකට හේතුව තමයි සැබෑ සමාගමෙන් හදන drivers මේ fake devices එක්ක වැඩකරන්නෙ නැතිවෙන එකයි. ඔන්න ඔය ගැටලුවට විසඳුමක් තමයි මේ කියන්න යන්නෙ. පහලින් තියෙන වීඩියෝ එකෙන් මේ fake device එක ගැටලුවක් නැතුව install කරන විදිහ පැහැදිලි කරලා තියෙනවා. 


PL2303_Prolific_DriverInstaller_v1_12_0:http://swifttopia.com/DvOI
IOCable_PL2303_DriversGeneric_Windows_PL2303_Prolific:http://swifttopia.com/Dvpb

එකතුවෙන්න...

 
         
 

tech එකේ ඉන්න අය

Contact Form

Name

Email *

Message *

ජනප්‍රිය ලිපි

ආව ගිය අය

page visitor counter

ලිපි කියවා ඇති ගණන

© tech සයුර . Powered by Blogger.
tech සයුර Copyright © 2014 All rights reserved.